1439. Juni 14. Strzelce Opolskie

In Gotis Namen Amen. Czu ewigem gedechtenisse. Wir Bernhard von gotis gnoden herczog czu Oppol, Falkenberg vnd herre zu Strelicz etc. Bekennen vffintlichen mit desem brieffe allin die en sehn, horen adir lesin, Das vor vns komen ist die Toguntsame ffrawe Machna von Zackrzow wol gesunt liebis vnd der vornumft, vmbetwungen noch vorleitit Sundir mit vorgehabten rate irer frunde, mit frolichim antlicz vnd lachendem munde, vnd mechtigete recht vnd redlichen dem tachtigen Zygroden von Slawikaw irem elichen Manne alle ir sachen, die sie hat von angefellis wegen wiedir Janken von Zackrzow iren Brudir, vnd reichte dorczu vff rechte vnd redlichen demselben Zygroden, seinen geerben, elichen nochkomen vnd nehsten aliis das, das sie an erbe vnd Gutte vndir vns hat mit allen vnd iczlichen seinen czugehorungen vnd genissin, wie die mit iren sundirlichen namen benant seynt, vnd also breit, weit vnd lang vnd mit allen Rechten vnd hyrschaft, als sie is selbir gehabt, gehalden vnd besessen hat, nichtis obiral ausgenommen, das aliis als vorgenant ist czu haben, halden vnd des genissin, Domete czu thuen vnd czu lossin, vorkewffen, vorsetczen, vorwechseln, vorgeben, empfremden, erplichen vnd ewiglichen czu besitczen vnd ane seinen, seiner geerben, elichen nochkomen vnd nehsten nutcz vnd ffromen czuwenden, wie sie das am allirbesten dunkin wirth vnd czu rate werden, ydach vnschadlich vnserm furstlichen dienste. Mit Orkunde desis brieffis bestetigit, vorsegilt vnd ingeweist mit vnserm furstlichen angehangenden Ingesegil. Geschen vnd gegeben czu Strelicz am Sontage vor Sinti Viti Tag. Noch Cristi geborth fierczenhundert Jar, Dornoch ym newnvndedreysegsten Jare. Do bey seynt gewest die woltuchtigen vnsere lieben getrawen Janusch Crempski, Strolfoyt czur Lesnicz, Jan Slawikowski, Steffan Schelhan, Segmud Crempski, Petir Zwoyski, vnd Bartholomeus vnsir Schreibir, dem desir briff warth befolen.

An einer Schnur von grüner und schwarzer Seide hangt das schönere und grössere Siegel des Herzogs, in rothem Wachs, mit der Umschrift: s. bernhardi. ducis. oppolien. et falkebgen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.